Антикор жемқорларды жариялайтын ашық реестр құруды ұсынады

Жемқорлыққа қарсы іс-қимыл агенттігінің төраға орынбасары Ұлан Сарқұлов Мәжіліс кулуарында жемқорларды жариялайтын ашық реестр құрудың маңыздылығын түсіндірді, деп хабарлайды POLITICO.KZ.

«Бұл реестрдің негізгі мәні – қоғам арқылы әсер ету. Біз айтамыз ғой: «Ұят болады». Сондықтан бұл тізім адамдардың мінез-құлқына ықпал етеді деп ойлаймыз», – деді Сарқұлов.

Оның айтуынша, ашық реестрді құруға айтарлықтай қаржы қажет емес.

Бұған дейін хабарланғандай, тізімге ауыр және аса ауыр жемқорлық қылмыс жасағандар енгізіледі. Реестрден шығу тек соттың ақтау үкімі мен соттылықтың алынуы негізінде мүмкін болады.

Жемқорлар тізімі Антикордың ресми сайтында жарияланатыны жоспарланып отыр.