АҚШ-та әуежайда екі ұшақ соқтығысып, адам өлімі тіркелді

АҚШ-тың Аризона штатындағы Скоттсдейл халықаралық әуежайында екі ұшақтың соқтығысуы салдарынан бір адам қаза тапты, ал тағы төртеуі жарақат алды, деп хабарлайды POLITICO.KZ.

Bombardier Learjet 35A ұшағы қону кезінде шассидің ақауына байланысты ұшу-қону жолағынан шығып, жеке меншік аумақта тұрақта тұрған Gulfstream G-200 бизнес-джетіне соғылған.

Оқиға 9 ақпан күні жергілікті уақытпен 14:45 шамасында болған. Федералды авиация әкімшілігінің (FAA) хабарлауынша, Learjet 35A-ның шассилері дұрыс жұмыс істемей, ұшақ қону жолағынан шығып кеткен.

Апат салдарынан бір адам сол жерде көз жұмды. Құтқарушылар мәйітті шығару үшін кешке дейін жұмыс істеді. Екі адам ауыр жарақат алып, жақын маңдағы аурухананың жансақтау бөліміне жатқызылды. Тағы бір адам жергілікті ауруханаға жеткізілді, ал төртінші жолаушы медициналық көмектен бас тартты.