АҚШ-тың Иранмен соғысына кеткен нақты шығын белгілі болды

АҚШ-тың Иранға қарсы 28 ақпанда басталған «Эпикалық қаһар» операциясы ел қазынасына шамамен 50 миллиард доллар шығын әкелген, деп хабарлайды Politico.kz.

CBS News мәліметінше, ресми көрсеткіштерден әлдеқайда жоғары бұл сомаға жойылған техника мен әскери базаларға келтірілген шығын кірмеген. Ал АҚШ Қорғаныс министрлігінің қаржы директоры Джулс Херст Конгреске тек 25 миллиард доллар көлеміндегі шығынды атаған.

Сарапшылардың айтуынша, негізгі шығын оқ-дәрілерге кеткен. Әсіресе, қорларды үздіксіз толықтыру қажеттілігі бюджетке ауыр салмақ түсіріп отыр. Сонымен қатар, АҚШ әскері кемінде 24 MQ-9 Reaper дронынан айырылған, олардың жалпы құны 720 миллион доллардан асады.

Қосымша шығындар қатарында жанармай, әскерді аймаққа жеткізу және әскери инфрақұрылымды орналастыру бар. CSIS орталығының кеңесшісі Марк Канчиан пайдаланылған қару-жарақ қорларын қалпына келтіру бірнеше жылға созылатынын атап өтті.

Сонымен қатар, Ақ үй Конгрестен қосымша 200 миллиард долларға дейін қаржы сұрауды жоспарлап отыр.

28 сәуірде АҚШ президенті Дональд Трамп Иран ұсынған бейбіт жоспарды қабылдамады. Ал The Wall Street Journal жазуынша, Вашингтон Иран экономикасына қысым жасау үшін ұзақ мерзімді теңіз блокадасына дайындалуда.

Сондай-ақ, гипердыбыстық Dark Eagle зымырандарын қолдану және арнайы күштерді жіберу мүмкіндігі де қарастырылып жатқаны айтылды.