Астанада қаза тапқан қыздың інісінің жағдайы белгілі болды

Астанадағы Millennium Park тұрғын үй кешенінде орын алған қайғылы оқиғаға қатысты жаңа мәліметтер белгілі болды

2009 жылы туған жасөспірім пышақ жарақатымен жедел хирургия бөліміне жатқызылған. Астана қалалық денсаулық сақтау басқармасының мәліметінше, оның жағдайы ауыр күйінде қалып отыр.

Еске салайық, 22 маусымда пәтерлердің бірінен пышақ жарақаттарымен жас әйелдің мәйіті табылған болатын. Куәгерлердің айтуынша, оған бұрынғы жігіті шабуыл жасаған. Кейін ол пәтерден шығып, қыздың кәмелетке толмаған інісіне де пышақпен шабуыл жасаған. Жасөспірімді аулада ауыр жарақатпен тауып, ауруханаға жеткізген.

Астана қалалық полиция департаменті күдіктінің ұсталып, уақытша ұстау изоляторына қамалғанын растады. Қылмыстық іс қозғалып, оқиғаның мән-жайы анықталуда.