Бақтияр Артаев бас бапкерлікке өзінің алғашқы жаттықтырушысын ұсынды

Афина Олимпиадасының чемпионы Бақтияр Артаев алғашқы жаттықтырушысы Нұрлан Ақүрпековті бокстан Қазақстан құрамасының бас бапкері қызметіне ұсынды, деп хабарлады politico.kz. 14 тамызда бокстан Қазақстан құрамасының бас жаттықтырушысы Мырзағали Айтжанов және бапкерлік құрамдағы 10 маман, ҚБФ вице-президенті Азиз Қожамбетов қызметінен босатылған еді.

Бокстан ұлттық құраманың бас бапкері қызметіне дәл қазіргі кезде Нұрлан Ақүрпеков лайық, - деп жазды Бақтияр Артаев Instagram-дағы парақшасына.

Нұрлан Ақүрпеков – Бақтияр Артаевтың алғашқы бапкері. Ол Артаевты 11 жасынан бастап боксқа баулып, жеке жаттықтырушысы да болды. Сондай-ақ бапкер Олжас Сәттібаев, Ғани Жайлауов, Әбілхан Аманқұл және т.б. танымал боксшыларды жаттықтырған. Еске сала кетсек, бокстан бас жаттықтырушы Мырзағали Айтжанов және бапкерлік құрамдағы 10 маман, ҚБФ вице-президенті Азиз Қожамбетов қызметтен босатылған еді. Ал Қазақстан бокс федерациясы президентінің кеңесшісі қызметіне Қазақстанның еңбек сіңірген жаттықтырушысы Тұрсынғали Еділов тағайындалды. Жаңа бапкерлік құрам кейінірек таныстырылады. Фото: inbusiness.kz