Бас мүфти діни атауларды қазақша қолдануға шақырды: Ифтар емес – ауызашар, сухур емес – сәресі

Рамазан айының қарсаңында Бас мүфти Наурызбай қажы Тағанұлы қазақстандықтарды ислам дініне қатысты қазақ тіліндегі атауларды қолдануға шақырды, деп хабарлайды POLITICO.KZ.

Оның айтуынша, ата-бабаларымыз ғасырлар бойы ислам дінін ұстанып, діни терминдерді қазақ тілінде қолданған. Сондықтан, ифтар орнына – ауызашар, ал сухур орнына – сәресі сөздерін пайдалану қажет екенін атап өтті.

«Дін – ұлттық болмысымыздың ажырамас бөлігі. Тілімізді сақтау – дәстүрімізді сақтау. Сондықтан діни ұғымдарды қазақ тілінде қолдану өте маңызды», – деді Бас мүфти.

Сонымен қатар, ол қасиетті Рамазан айында барша мұсылмандарды сауапты істер жасауға, азық-түлік бағасын қымбаттатпауға және мұқтаж жандарға қолдау көрсетуге шақырды.

Айта кетейік, 2025 жылы Рамазан 1 наурызда басталып, 29 күнге созылады. Қадір түні 26-27 наурызға қараған түні өтеді, ал Ораза айт 30 наурызға белгіленген.

Ақпарат STAN.KZ сайтынан алынған.