Бокстан ұлттық құраманың бас бапкері Мырзағали Айтжанов 4 млн теңге сыйақы алды

Қазақстан бокс федерациясының президенті Шахмұрат Мүтәліп биыл Астанада өткен U22 Азия чемпионатындағы жоғары нәтиже көрсеткен спортшылар мен бапкерлерді ақшалай марапаттады. Бұл туралы Politico.kz Қазақстан бокс федерациясының Instagram парақшасына сілтеме жасап хабарлайды. Бас бапкер Мырзағали Айтжановқа 4 миллион теңге, ал боксшыларға 1-2 миллион теңгеден табысталды. Іс-шара Түркістан облысында «Алматау» спорттық базасындағы оқу-жаттығу жиыны аясында өтті. Айта кетейік, Астанада бокстан 22 жасқа дейінгі спортшылар арасындағы Азия чемпионатында Қазақстан командалық есепте 1-орын алды. Құрлық біріншілігінде 25 салмақ бойынша (13 ер, 12 әйел) жеңімпаздар анықталды. Еліміздің боксшылары 24 медаль еншіледі. Ерлер командасында 13 медаль бұйырды (8 алтын және 5 күміс). Азия чемпионы атанғандар:

• 51 кг: Кенже Мұратұлы;
• 54 кг: Нұрсұлтан Алтынбек;
• 67 кг: Елнұр Сүйінбай;
• 71 кг: Сабыржан Аққалықов;
• 75 кг: Диас Молжігітов;
• 80 кг: Ерасыл Жакпеков;
• 86 кг: Темірлан Мұқатаев;
• 92 кг: Бекнұр Батырбек.