Данияр Әшімбаев Жеңістің 80 жылдығына арнап жаңа кітап шығарды
Белгілі саясаттанушы Данияр Әшімбаев Жеңістің 80 жылдығына орай жаңа кітап шығарды, деп хабарлайды POLITICO.KZ.
«Кто есть кто в Казахстане» энциклопедиясының авторы Данияр Әшімбаев «Война известная и неизвестная» атты жаңа еңбегін жарыққа шығарды. Оның айтуынша, бұл кітапта ол соғыстың басталуы, барысы мен қорытындысы, сондай-ақ ұлттық фактордың рөлі туралы зерттеген.
— Бұл кітапты жазу идеясы күтпеген жерден туды. Соңғы жылдары антропология, лингвистика, этнография және ұлттық мәселелерді көп зерттедім. 9 мамырға дейін жазып үлгеремін деп уәде бердім де, бірден дереккөздерді ақтара бастадым. Алғашқы жоспарым мүлдем өзгеріп, тарихты қайта бастан өткергендей болдым, — деді саясаттанушы.
Кітапта ол соғыстың басталу себептерінен бастап, Екінші дүниежүзілік соғыс кезіндегі идеологиялық және ұлттық факторларды терең зерттеген. Автордың айтуынша, бұл еңбекте Еуропа, Азия, Кеңес Одағы және Қазақстандағы жағдайлар егжей-тегжейлі талданған.
— Біз тарихи оқиғаларды көбіне контекстен тыс қарап, себеп-салдарлық байланыстарды жоғалтып аламыз. Кітапта соғыстың жаһандық сипатымен қатар, Қазақстанның осы оқиғалардағы орнын да көрсетуге тырыстым, — деді ол.
Саясаттанушы сонымен қатар Қазақстанның Ұлы Отан соғысындағы маңызына да ерекше тоқталған. Оның пікірінше, Қазақстан жүздеген мың эвакуацияланғандарды қабылдап, майданға қажетті шикізат пен ресурстарды жеткізуде айрықша рөл атқарған.
— Біздің жауынгерлеріміз Мәскеуді қорғады, Сталинград пен Курскіде шайқасты, Берлинге дейін жетті. Қазақстан тек солдаттар мен офицерлерімен емес, сондай-ақ инженерлерімен, геологтарымен, шахтерлерімен де жеңіске үлес қосты. Бұл — біздің ұлттың жаңа тарихтағы батыр бейнесін қалыптастырған кезең, — деді Данияр Әшімбаев.
Ол сонымен бірге соғыс туралы деректерді жаңаша қарастырып, бүгінгі саяси риторика мен постколониалдық дискурс тұрғысынан түсіндіруге тырысқанын айтты. Автор тарихи естеліктер мен құжаттарға, сондай-ақ отандық және шетелдік зерттеулерге сүйенген.
— Ұлы Отан соғысы — біздің тарихымыздағы ең ұлы оқиға. Біздің аталарымыз абсолютті зұлымдықты жеңіп, бүкіл адамзатқа болашақ сыйлады. Біз оны ұмытпауымыз керек, — деді саясаттанушы.
«Война известная и неизвестная» кітабы қазірдің өзінде сатылымға шықты. Бұл еңбек - Қазақстан тарихындағы елеулі кезеңге жаңаша көзқарас ұсынатын ғылыми-көпшілік басылым.
Ақпарат check-point.kz сайтынан алынған.
Соңғы жаңалықтар
