Көлікті рұқсатсыз мінген жасөспірім жазадан қорқып, өзіне қол жұмсады

Ресейдің Иркутск облысындағы Бирюсинск қаласында кәмелетке толмаған оқушы ата-анасының автокөлігін рұқсатсыз мініп кетіп, жол апатына ұшыраған соң өзіне қол жұмсады. Бұл туралы ресейлік БАҚ мәлімдеді.

Оқиға 7 маусым күні түнде болған. 14 жастағы оқушы анасы ұйықтап жатқанда "Land Cruiser" автокөлігінің кілтін алып, өзі рұқсатсыз айдап кеткен. Әкесі сол сәтте үйде болмаған.

Қала ішінде жүрген бала Калинин көшесі маңында ағаш бағанаға соғылып, көлікті зақымдаған. Кейін үйіне оралып, көлікті аулаға қойған.

Осыдан соң бала қатты қорқып, жазаланудан сескеніп, өз-өзіне қол жұмсаған. Оның денесі келесі күні таңертең үй мен сарай арасынан табылған.

Қазіргі уақытта оқиға бойынша тергеу амалдары жүргізілуде.