Мәжіліс депутаты халықтан үнем талап етіп қарызға батқан үкіметті сынады

Парламент Мәжілісінде депутат Ерлан Стамбеков үкіметтің қаржылық саясатын қатаң сынға алып, мемлекет қарызының күрт өсуін қарапайым халықтың несиеге батуымен салыстырды. Оның сөзіне қарағанда билік азаматтардан қатаң тәртіп талап еткенімен өзі қарыз алуды тоқтатар емес, деп хабарлайды Politico.kz.

Мәжілістегі бюджет саясатын талқылау кезінде халық қалаулысы үкіметтің қос стандартты ұстанымына шүйлікті. Ол қазіргі таңда қарапайым халықтың қарызға батуымен белсенді күрес жүріп жатқанын, алайда дәл осындай қатаң талаптар мемлекеттік қаржы жүйесіне де қолданылуы керек екенін баса айтты.

«Мемлекет азаматтардың несиелік жүктемесін азайту бойынша өте қатаң саясат жүргізіп отыр, сондай-ақ банктерге қарыз алушының төлем қабілетін бағаламай жаңа несие беруге тыйым салынған, алайда үкіметтің өзі берешегін азайтуға мүлдем ұмтылмайды», — деді Ерлан Стамбеков.

Депутат келтірген мәліметтерге сүйенсек тек 2025 жылдың өзінде Қазақстанның мемлекеттік қарызы бірден 4,8 трлн теңгеге өскен. Сонымен қатар ол үкімет тартқан қаражаттың басым бөлігі ел экономикасын дамытуға емес, бұрынғы берешектерді жабуға жұмсалып жатқанына ерекше назар аударды.

«Биылғы жылы алған қарыздың жартысынан көбі бар берешекті қайта қаржыландыруға пайдаланылды, бұл жалпы көлемі 8,2 трлн теңге қарыздың 51 пайызын құрайды. Егер біз азаматтардан қаржылық тәртіпті талап етсек, мұндай тәртіп бірінші кезекте мемлекет деңгейінде қамтамасыз етілуі тиіс», — деді Мәжіліс депутаты.

Жиынға қатысқан қаржы министрі Мәди Такиев халық қалаулысының сынымен толықтай келісіп, мемлекеттік органдар үшін де қаржылық тәртіптің аса маңызды екенін растады.

«Сізбен келісемін, бізде қаржылық тәртіп тек азаматтар мен бизнесте ғана емес, сонымен бірге мемлекетте де болуы керек», — деді Мәди Такиев.

Дегенмен ведомство басшысы қазіргі мемлекеттік қарыз көлемі толықтай бақылауда екенін және қауіпсіз шекте тұрғанын алға тартты. Оның мәлімдеуінше Қазақстан үшін мемлекеттік қарыздың шекті деңгейі ішкі жалпы өнімнің 32 пайызынан аспауы қажет.

«Мемлекеттік қарыз қауіпсіз шекте тұр, бізде ішкі жалпы өнімнің 32 пайызы көлеміндегі шекті деңгей бекітілген, біз одан аспауымыз керек», — деді Мәди Такиев.

Министрліктің ресми деректеріне сәйкес 2026 жылдың 1 қаңтарындағы жағдай бойынша елдің мемлекеттік қарызы 36,4 трлн теңгені құраған. Бұл ішкі жалпы өнімнің 22,8 пайызына тең болса, бүгінгі таңда жалпы берешек көрсеткіші 36,6 трлн теңгеге дейін өсіп отыр.