Мектеп асханаларын ескертусіз тексереді: Үкімет басшысы депутат сауалына жауап берді
ҚР Премьер-министрі Олжас Бектенов мектептегі тамақтану сапасына қатысты Мәжіліс депутатының сауалына ресми жауап берді, деп хабарлайды Politico.kz
Үкімет басшысының мәліметінше, қазіргі таңда ел бойынша 4 миллионға жуық оқушы ыстық тамақпен қамтылған. Бұл мақсатқа бюджеттен 192 миллиард теңге бөлінді. Жауапта ас мәзірінің жаңа стандарттары бекітілгені, оған сәйкес балаларға ет, сүт өнімдері, көкөністер мен жемістер міндетті түрде берілуі керектігі айтылған.
Басты жаңалық - бақылау жүйесінің өзгеруі. Енді мектеп асханаларына алдын ала хабарлаусыз, кенеттен тексеру жүргізу механизмі заңдастырылды. Сондай-ақ өнімдерді зертханалық тексеру ауқымы кеңейтілді. Нәтижесінде отандық қана емес, импорттық өнімдерден де заң бұзушылықтар анықталған.
Депутат өз сауалында бір балаға бөлінетін 484–750 теңге көлеміндегі қаржының жеткіліксіз екенін көтерген болатын. Оның пікірінше, мұндай төмен тарифпен сапалы стандарттарды сақтау қиын. Үкімет бұл мәселені назарға алғанын және оңтайлы шешім іздеу жұмыстары жалғасатынын жеткізді.
— Бұл мәселені желтоқсан айында ата-аналар мен асхана қызметкерлерінің шағымынан соң көтердім. Үкімет тақырыптың өзектілігін мойындап, нақты шаралар қабылдады. Мектептегі тамақ — есеп үшін қажет цифр емес, бала денсаулығы үшін күнделікті жауапкершілік, — деді Екатерина Смолякова.
Соңғы жаңалықтар
