«Менің жетінші жүктілігім»: Жұлдыз Әбдукәрімова өзі туралы ашық айтты

Қазақ актрисасы, әнші Қайрат Нұртастың жары Жұлдыз Әбдукәрімова жуырда көпшілік алдында дөңгелене бастаған ішін көрсетіп, әлеуметтік желіде шынайы сырын ақтарды, деп хабарлайды POLITICO.KZ.

«Бұл – менің жетінші жүктілігім. Мен мұны алғашында білмедім де, сезбедім де. Ағзам оны қабылдап, осы процесті атқарып жатқанын да байқамадым. Әрине, бұл – сол кезеңде менде көптеген қиындық болғандықтан, қалыпты жағдай. Бұл жағдайға бүкіл ел куә болды.

Бұдан бөлек, көпшілік білмейтін жеке мәселелерім де болды... Шынымен абыржып жүрдім. Күйзелісте болдым», – деп жазды Жұлдыз.

Актриса өзімен болған бұл оқиғаны дер кезінде келген кереметке балап отыр.

«Ішімде соғып жатқан кішкентай жүрек менің бүкіл мәселемді шешіп бергендей. Өйткені өмірімде өзім күтпеген үлкен өзгерістер басталды. Бәрі бір қызықты фильмнің сценариі сияқты», – деп жалғастырды ол.

Жұлдыз бұл сәбиді Жаратушының ең ғажайып сыйы деп атады.