Мұғалімін боқтаған Назарбаев мектебінің оқушысы аттестат алды

Алматы қаласындағы Назарбаев Зияткерлік мектебінің (НЗМ) 11-сынып оқушысы Сұңқар, 2025 жылдың 23 мамырында тәртіп бұзғаны үшін оқудан шығарылғанымен, емтихан тапсырып, орта білім туралы аттестат алу құқығына ие болды.

Адвокаттың Threads әлеуметтік желісінде мәлімдеуінше, қоғамның шамамен 20 пайызы оқушыны қолдап, оның білім алуға деген құқығын қорғады. Сұңқар бірнеше күн ішінде емтихандарын күйзеліс жағдайында тапсырып, оқу жылын жоғалтпай аяқтауға тырысқан.

Оқиға қоғамда түрлі пікір туғызды. Бір тарап бұл шешімді әділеттілік деп бағаласа, екінші тарап жасөспірімнің тәртіп бұзушылық әрекеттері үшін жауапкершілікке тартылмағанына наразы.

Қолдаушылар: "Жасөспірім қысымға қарамастан өз құқығын қорғады", – десе, сын айтушылар: "Мұғалімді қорлағаны үшін еш жаза қолданылмады", – деп наразылық білдіруде. Кейбірі оқушының мінез-құлқы мен ата-ананың тәрбиесіне күмән келтіріп отыр.

Сұңқардың айтуынша, оқиға орын алған күні ол эмоционалды күйде болған. Телефоны тартып алынғаннан кейін сыныптан шығып, өз-өзіне бірдеңелерді айтып жүрген. Алайда нақты не айтқанын есіне түсіре алмайтынын жеткізді.

Адвокат алдағы уақытта істің жаңа мәліметтері жарияланатынын мәлімдеді. Қала тұрғындары бұл жағдайдан нақты қорытынды шығады деп үміттенуде.