"Өкініш биледі". Танымал әзілкеш ұлына қатысты өкінішін айтты

«Әйгерім Сейфолланың сырласуы» бағдарламасына қатысқан белгілі актер, әзілкеш бала тәрбиесіне қатысты өз ойымен бөлісті. Ол шетелге оқуға аттандырған ұлы туралы айтып, ата-аналық өкінішін жеткізді, деп хабарлайды POLITICO.KZ.

«Баламды Америкаға ұшырып, шығарып салған кезде кеудеме өксік толып, мені өкініш биледі. Шешесі екеуіміз далада бақырып жылап жүрміз. Сонда бала бүлінеді-ау, шалыс басады-ау деген қорқыныш болған жоқ. Ер бала болғаннан кейін өмірге өзі бейімделуі керек қой... Бірақ ең маңыздысы – оның маған деген көңілі тоқ болып, сенімді кетіп бара жатқаны ма? Міне, мәселе осында. Ойланып отырсам, әкесі бола тұра баламмен бірге өткізген сәттерім есіме түспейді екен. Бала қайда барады?!» – деді ол.

Әзілкеш осы оқиғадан кейін бірден әлеуметтік желіде өз ойын бөліскенін де айтты.

«Сол кезде «өкініп қалмаңыздар» деген едім. Біз әке тәрбиесі дегенде нақыл сөз айтып, бағыт-бағдар беру керек деп ойлаймыз. Жоқ, балаңмен ойнаудың өзі жеткілікті. Ешқандай тәрбие бермей-ақ, тек уақыт бөлші», – деді әртіс.