«Өлтіріп кетеді деп қорқамын»: Алматылық блогер бұрынғы жігітінен қорқып жүргенін айтты

Алматы тұрғыны әрі бьюти-блогер Руфелия әлеуметтік желіде бұрынғы сүйіктісі тарапынан бірнеше рет күш көрсетіліп, қорқытуға ұшырағанын айтты, деп хабарлайды Politico.kz агенттігі “Azattyq Ruhy”-на сілтемемен.

Оның сөзінше, қарым-қатынас аяқталғаннан кейін де ер адам оны аңдып, өзіне және жақындарына қоқан-лоқы жасаған.

Блогердің айтуынша, бұрынғы жігіті Арман оған бірнеше рет шабуыл жасаған. Руфелия жағдайдың соңы қайғылы жағдайға ұласуы мүмкін деп алаңдайтынын жеткізді.

Оның сөзінше, алғашқы екі жағдайдан кейін полицияға арыз жазбаған. Бұған ер адамның отбасылық жағдайын ескергені себеп болған. Алайда үшінші оқиға кезінде бұрынғы серігі оған ауыр соққы жасағанын айтады.

Руфелияның мәлімдеуінше, сол кезде ер адам полиция бөлімінде өзіне тағылған айыпты жоққа шығарған. Алайда блогерде болған аудиожазбада оның қорқыту сөздері естілген.

Кейінгі жағдайлардың бірінде, блогердің айтуынша, бұрынғы жігіті достарының үйіндегі кездесуде оған дөрекілік көрсетіп, шашынан тартқан және үстіне су құйған. Сонымен қатар оған қоқан-лоқы жасаған.

Блогер бұрынғы сүйіктісін үй жануарына қатысты жағдайға да күдіктенетінін айтты. Оның сөзінше, жақында иті жоғалып кеткен. Кейін белгісіз адамдар иттің табылғанын айтып, емделуіне ақша талап еткен. Руфелия бұл оқиғаның бұрынғы жігітімен байланысы болуы мүмкін деп күдіктенеді.

Оқиғаға байланысты Алматы қаласының полиция департаменті де түсініктеме берді. Ведомство мәліметінше, әйел шілде айында Медеу аудандық полиция басқармасына жүгінген.

Полицияның хабарлауынша, дене жарақатын салу фактісі бойынша қылмыстық іс қозғалып, күдікті ұсталған және уақытша ұстау изоляторына қамалған. Тергеу аяқталғаннан кейін іс материалдарымен бірге сотқа жолданған.

Енді бұрынғы серігіне қатысты жауапкершілік мәселесін сот шешеді.