Олжас Бектенов: Алатау қаласын дамыту қағидаттары жаңа Конституция жобасында қамтылды

Премьер-министр Алатау қаласын дамыту жөнінде жиын өткізді, деп хабарлайды Politico.kz.

Үкімет басшысы Олжас Бектенов Алатау қаласын дамыту жөніндегі кеңестің отырысын өткізді. Жиында инвестициялық жобалар мен инфрақұрылым құрылысы және заңнамалық мәселелер талқыланды.

Олжас Бектенов Президенттің жаңа қалаға ерекше көңіл бөліп отырғанын айтты. Мемлекет басшысы Алатауды ұзақмерзімді экономикалық дамудың жаңа орталығы ретінде белгілеген. Қазір Парламентте қаланың арнаулы мәртебесі туралы заң жобасы қаралып жатыр. Елде арнайы құқықтық режимдер пайда болады. Бұл Қазақстанның экономикалық мүддесіне сай келеді және инвесторларды тартуға мүмкіндік береді.

«Алатау қаласын дамыту – бұл ерекше мәртебеге ие, жеделдетілген дамудың заманауи цифрлық қаласын құруға бағытталған инновациялық шешім», – деді Премьер-министр.

Премьер-министрдің орынбасары Қанат Бозымбаев атқарылып жатқан жұмыстарды баяндады. Қалада Iconic Complex көпфункционалды кешені мен KAIST Kazakhstan технологиялық университеті салынады. Жалпы инвестициялық қоржын өнеркәсіп және логистика салаларындағы 44 жобадан тұрады. Оның жалпы құны 1,8 триллион теңгені құрайды. Бұл жобалар іске асса 30 мыңнан астам жаңа жұмыс орны ашылады.

Жиында инженерлік желілер мен жол мәселесіне баса назар аударылды. Электр қуатымен қамту үшін «Арна» қосалқы стансасы салынып жатыр. Су мәселесін шешу мақсатында «Ынтымақ» су тоғаны кеңейтіледі және тазарту стансалары салынады. Газбен қамту және жол инфрақұрылымы бойынша да нақты жобалар бар.

Alatau City Authority өкілі Әлішер Әбдіқадыров қаланың бас жоспары мен даму стратегиясы әзірленгенін хабарлады. Құрылыс барысында ғимараттардың биіктігі мен автотұрақтардың қолжетімділігі қатаң ескеріледі. Сондай-ақ адами капиталды дамыту үшін Шэньчжэнь мен Дубай тәжірибесі қолданылады. Бұл білікті мамандарды тартуға бағытталған.

Кеңес қорытындысы бойынша қатысушылар ұсынылған жоспарларды қолдады. Жұмысты үйлестіру үшін арнайы Жедел комитет құрылды. Бектенов министрліктер мен Алматы облысының әкімдігіне инфрақұрылымды дамыту бойынша бірқатар тапсырма берді.