Павлодар облысында полицей атылып қалды: Бір топ әріптесі қызметтен кетті

Павлодар облысы прокуратурасының мәліметінше, өңірде өзін атып өлтірген полицейдің өлімінен кейін әріптестері қызметінен босатылды, деп хабарлайды Politico.kz. Ведомство ақпаратына қарағанда, Павлодар облысында 22 жастағы полицейдің өз-өзіне қол жұмсау фактісі бойынша тергеу жалғасып жатыр. Биыл маусым айында Ертіс аудандық полиция бөлімінің кіші сержанты өзіне оқ атқан. Сотқа дейінгі тергеп-тексеру Қылмыстық кодекстің 105-бабының 1-бөлігі ("Адамды қорқыту, қатыгездікпен қарау немесе жүйелі түрде қорлау арқылы өзін-өзі өлтіруге итермелеу немесе өзін-өзі өлтіруге оқталу") бойынша жүргізіліп жатыр. Қадағалау органы қызметтік тексеру нәтижелерін де хабарлады.

Павлодар облысы Полиция департаментінің Ішкі қауіпсіздік басқармасы аталған факті бойынша қызметтік тексеріс жүргізді, нәтижесінде Ертіс аудандық полиция бөлімі мен полиция бөлімінің бірқатар қызметкері қатаң тәртіптік жауапкершілікке тартылды, оның ішінде кейбіреулері жұмыстан босатылды, – деді Павлодар облысы прокурорының орынбасары Ербол Ысқақов.

Тергеу мүддесіндегі басқа ақпарат жария етілмейді. Еске салайық, бұған дейін әлеуметтік желілерде кіші сержанттың үйінде болған кезінде өзіне-өзі қол жұмсау туралы хат қалдырып, қызметтік қаруымен басынан атып өлгені хабарланған еді. Ауыр оқ жарақатын алған полицей 29 маусымға қараған түні Ертіс кентінен Павлодар қалалық No1 ауруханасының жансақтау бөліміне жеткізілді. Жас жігіт комаға түскен. Келесі күні кешке қайтыс болды. Фото: ашық дереккөз

#оқ ату #Павлодар облысы #полицей #Полиция департаменті #прокуратура #суицид #қызмет