«Қазақмыс» корпорациясының жаңа басқарма төрағасы тағайындалды

«Қазақмыс корпорациясы» ЖШС Руслан Өскенәлінің басқарма төрағасы қызметіне кіріскенін мәлімдеді, деп хабарлайды Politico.kz.

1984 жылы дүниеге келген жаңа басшы Әл-Фараби атындағы Қазақ ұлттық университетін халықаралық құқық мамандығы бойынша бітіріп, кейін Woodbury University оқу орнында іскерлік әкімшілендіру магистрі дәрежесін алған. Коммерциялық және өнеркәсіптік салаларда мол басқарушылық тәжірибе жинаған ол бұған дейін де «Қазақмыс» корпорациясында, сондай-ақ Alstom және General Electric сияқты ірі халықаралық ұйымдарда жауапты лауазымдарда еңбек еткен.

2024 жылдың наурыз айынан бастап Руслан Өскенәлі Qarmet кәсіпорнында жабдықтау жөніндегі директор ретінде жұмыс істеп, сатып алу бағытын стратегиялық тұрғыдан дамытумен және жабдықтау процестерін оңтайландырумен айналысқан. Сондай-ақ ол аталған компанияда басқарма мүшесі ретінде жалпы басқару мәселелеріне қатысты маңызды шешімдер қабылдауға қатысқан.

Жалпы алғанда жаңа төрағаның кәсіби жолы ірі кәсіпорындардың активтері мен операциялық қызметін басқаруды, сонымен қатар стратегиялық маңызды жобаларды іске асыруды қамтиды. Ол өзін жұмыс тиімділігін арттыруға бейімделген, ұйым ішіндегі корпоративтік мәдениетті құрметтейтін және қызметкерлердің әлеуетін дамытуға баса назар аударатын маман ретінде танытқан.