Қазақмыстағы өрт дабылы: Жұмысшылар шахтадан қалай құтқарылды

Шығыс Жезқазған кенішінің Анненск шахтасында өрт сөндіру және адамдарды эвакуациялау бойынша оқу-жаттығу өтті, деп хабарлайды Politico.kz.

Жаттығу сценарийі бойынша оқпанда өрт шығып, жұмысшылар дереу қауіпсіз жерге шығарылды. Құтқарушылар мен өрт сөндірушілер қауіпті аймақты қоршауға алып, шартты түрде зардап шеккен адамды іздеп тауып, оған алғашқы көмек көрсетті. Бұл шараға тау-кен құтқару қызметі мен газдан құтқару тобы жұмылдырылып, олар арнайы құралдардың көмегімен жалынды ауыздықтады.

Мұндай жаттығулар жұмысшылардың күтпеген апаттарға дайындығын тексеріп, құтқару қызметтерінің өзара байланысын жақсартуға бағытталған. Қазақмыс корпорациясының басқарма төрағасы Руслан Өскенәлі биылғы жылды өндірістік қауіпсіздік жылы деп жариялаған болатын. Осыған орай 2026 жылы компания кәсіпорындарында 100 рет осындай практикалық жаттығу өткізу жоспарланып отыр.

Сонымен қатар Дүниежүзілік еңбекті қорғау күні қарсаңында тау-кен шахта жабдықтары зауытының механикалық цехында да дәл осындай жаттығу ұйымдастырылды. Жұмысшылар құтқарушылармен бірге адамдарды апат орнынан қауіпсіз жерге шығару және өртті сөндіру әрекеттерін пысықтады. Мамандар осы шаралар арқылы қауіпсіздік жүйесіндегі кемшіліктерді анықтап, қызметкерлердің өмірі мен денсаулығын қорғауды басты назарда ұстайтынын мәлімдеді.