Қазақстан ресейлік ғалымды шекарадан өткізбеді

Қазақстан ресейлік ғалым Андрей Грозинді елге кіргізбеді, деп хабарлайды POLITICO.KZ.

2025 жылдың 27 сәуірінде белгілі ресейлік тарихшы, Ресей ғылым академиясының Шығыстану институтының аға ғылыми қызметкері, ТМД елдері институтының Орта Азия және Қазақстан бөлімінің меңгерушісі Андрей Грозин Қазақстанға сараптамалық шараға қатысу үшін келген еді. Алайда шекарада оны елге кіргізбей кері қайтарды.

Бұл туралы Евразиялық аналитикалық клуб басшысы Никита Мендкович өзінің Telegram арнасында хабарлады. Оның айтуынша, Грозин Қазақстанның «қара тізіміне» енгізілген.

«Андрей Грозин — өңірді жақсы білетін беделді тарихшы әрі сарапшы. Ол ұзақ жылдар бойы Қазақстанда өмір сүріп, еңбек еткен. Оны елге кіргізбеу — Қазақстан мен Ресей арасындағы тарихшылар арасындағы диалогты бұзу. Бұл диалог былтыр күзде президенттер деңгейінде мақұлданған болатын. Маған қазірдің өзінде тарихи комиссиялардың бірнеше отырысы Қазақстан тарапынан саботажға ұшырағаны туралы ақпарат келіп жатыр», – деп жазды Мендкович.

Ол кейінірек Грозиннің Қазақстанға кіре алмауы Қазақстан Мәжілісінің депутаты Айдос Сарымға Ресейге кіруге тыйым салынуымен байланысты екенін мәлімдеді.

«Қазақстандық шекарашылардың айтуынша, менің РК-ға 'кірмеуім' Айдос Сарымның Ресейге кіре алмауымен байланысты», – деп Грозиннің сөзін келтірді Мендкович.

Бұл жағдайға саясаттанушы Данияр Әшімбаев та пікір білдірді:

«Біздің шекарашылардың ресейлік белгілі ғалымды елге кіргізбегені мені таңғалдырды әрі қынжылтты. Екі елде бір-біріне жау бағытта пікір айтқан тұлғалардың тізімі болуы мүмкін. Бірақ Грозиннің оған қандай қатысы бар? Мен оны көп жылдан бері білемін. Ол — кәсіби, кейде сын айтса да, объективті зерттеуші. Оны Қазақстанға қарсы бағыттағы адам деп айтуға болмайды», – деді Әшімбаев.