Қазақстанда несие беру ережелері өзгеруі мүмкін

Қазақстан Ұлттық банкі банктердің несие беру тәртібін күшейтетін жаңа нормативтер әзірлеп жатыр. Бұл туралы Ұлттық банк төрағасы Тимур Сүлейменов мәлімдеді, деп хабарлайды Politico.kz.

Оның айтуынша, жаңа талаптар қарыз алушылардың табысын ескере отырып несие беру жүйесін енгізуге бағытталған. Осы мақсатта екі негізгі коэффициент — КДН және КДД қолданылмақ.

Бұл көрсеткіштер азаматтардың алған несиесін қайтару мүмкіндігін бағалауға көмектеседі. Яғни банктер қарыз алушының табысы оның қарыздық жүктемесін көтере ала ма, жоқ па — соны есептейді.

Жоспар бойынша жаңа коэффициенттер 2026 жылдың 1 шілдесінен бастап енгізілуі мүмкін.

Айта кетейік, КДН және КДД көрсеткіштері банктер мен қаржы реттеушілеріне несие беру кезіндегі тәуекелдерді бағалауға мүмкіндік береді. Бұл шаралар халықтың шамадан тыс қарызға батуын азайту және қаржы жүйесінің тұрақтылығын сақтау мақсатында қолға алынбақ.