Қазақстанда шетелдік тауарлар ығыстырыла бастады, биыл 1,7 трлн теңгенің жаңа өндірісі іске қосылады

Бүгін Астанада өткен үкімет отырысында премьер-министр Олжас Бектенов отандық өндірушілерді қолдаудың негізгі тетіктері толық енгізілгенін және ендігі басты мақсат қазақстандық өнімдерді экспортқа шығару екенін мәлімдеді, деп хабарлайды Politico.kz сайты nacanalytica.kz сайтына сілтеп.

Әлемдік экономикадағы тұрақсыздық пен логистикалық тізбектердің бұзылуы аясында Қазақстан шикізаттық бағыттан бас тартып, өңдеу өнеркәсібіне басымдық беріп отыр. Мемлекет басшысының тапсырмасымен қолға алынған жаңа өнеркәсіптік саясат нақты нәтижесін беріп, салықтық жеңілдіктер мен қолдау шараларының арқасында отандық тауарлардың ішкі нарықтағы үлесі күрт артқан. Ұлттық аналитикалық орталықтың мәліметінше биылғы жылдың бірінші жартыжылдығында өңдеу өнеркәсібі 9,8%-ға өссе, тамақ өндірісі 14,7%-ға және сусындар шығару 4,4%-ға артқан.

Елімізде кейінгі жылдары шетелден келетін импорттық тауарлардың өсімі тоқтап, олардың орташа жылдық қарқыны 23,9%-дан 2,9%-ға дейін күрт төмендеген. Осылайша ішкі өндіріс базасы сыртқы жеткізілімдерді біртіндеп алмастырып, машина жасау саласының өндірістегі үлесі 17,2%-ға және жоғары технологиялық өнімдер көлемі 27,6%-ға дейін көтерілді. Өсімді одан әрі ұлғайту мақсатында биыл жалпы құны 1,7 трлн теңгені құрайтын 200 индустриялық жобаны іске асыру жоспарланған, ал бұл кәсіпорындар толық қуатына көшкен кезде жыл сайын 1,5 трлн теңгенің өнімін шығарып, оның шамамен 500 млрд теңгеге жуық бөлігін шетелге экспорттайтын болады. Сонымен қатар ауыл шаруашылығы машиналарын жасау саласында да айтарлықтай серпіліс байқалып, отандық кәсіпорындар ішкі нарықты тракторлар мен комбайндармен 90%-ға қамтамасыз етіп отыр және мемлекеттік сатып алудағы қазақстандық техниканың үлесі 95%-ға жетті.

Отандық бизнесті қолдаудың тағы бір маңызды құралы ретінде биылғы 1 қаңтардан бастап Қазақстандық тауар өндірушілер тізілімі іске қосылды. Шілде айындағы жағдай бойынша бұл цифрлық жүйеге 6574 кәсіпорын енгізілсе, оның 4552-сі өз өнімін шығаратын зауыттар мен фабрикалар болып табылады. Жаңа жүйе өндірістік қызметті мемлекеттік ақпараттық базалар арқылы тексеріп, әкімшілік кедергілерді азайтуға және мемлекеттік жеңілдіктердің тек нақты өнім шығаратын адал кәсіпкерлерге берілуін қамтамасыз етуге бағытталған.

Үкімет тек дәстүрлі қолдау шараларымен шектелмей, сатып алушылардың мінез-құлқына әсер ететін заманауи тәсілдерді де сәтті қолданып жатыр. Сауда және интеграция министрлігі мен QazTrade компаниясы 1 маусымнан бастап жүзеге асырған арнайы жобаның арқасында еліміздің барлық өңіріндегі 40 сауда желісінде қазақстандық ірімшік сатылымы 7%-ға өскен. Бұған қоса алдағы уақытта мал шаруашылығын дамытудың бес жылдық кешенді жоспары аясында ет өндірісін 1,8 млн тоннаға жеткізіп, оның экспортын екі есеге арттыру және ішкі нарықты негізгі азық-түлікпен 100% толық қамту көзделіп отыр.