Қазақстандықтар бақыттырақ бола түсті

Қазақстан бақытты елдер рейтингінде тарихи рекорд орнатып Франция мен Италияны артта қалдырды, деп хабарлайды Politico.kz.

World Happiness Report 2026 жаңа баяндамасына сәйкес Қазақстан 147 мемлекеттің ішінде 33-орынға көтерілді. Бұл еліміздің рейтингке қатыса бастаған 2011 жылдан бергі ең жоғары көрсеткіші.

Былтырғы есеппен салыстырғанда қазақстандықтар бірден 10 сатыға алға жылжыған. Өмір сүру сапасының жалпы бағасы 10 баллдың ішінен 6,6 баллды құрады.

Анықтама: Рейтинг нәтижесі халықтың табысы, әлеуметтік қолдау, таңдау еркіндігі мен жемқорлықты қабылдау деңгейі сияқты бірнеше фактор бойынша есептеледі.

Әлемдегі ең бақытты елдер тізімін бірнеше жыл қатарынан Финляндия бастап тұр. Одан кейінгі орындарда Исландия мен Дания орналасқан. Орталық Азия елдерімен салыстырғанда Қазақстан тұрғындары әлдеқайда бақытты болып шықты. Көршілес Өзбекстан 53-орында, Қырғызстан 66-орында тұрса, Ресей бір жыл ішінде 13 сатыға төмендеп 79-орынға тұрақтады. Ең төменгі бағаны 1,4 балл жинаған Ауғанстан алды.

Қазақстанның экономикалық жағдайы мен ішкі жалпы өнімі Еуропа елдерінен төмен болғанымен тұрғындардың бақыт деңгейі жоғары. Біздің ел тіпті Франция, Италия және Испания сияқты дамыған мемлекеттерді басып озды. Соның ішінде әлеуметтік қолдау көрсеткіші бойынша Қазақстан әлемде 4-орынға шықты. Сауалнамаға қатысқан қазақстандықтардың 95 пайызы қиын сәтте отбасы мен достарына немесе еріктілерге арқа сүйей алатынын айтқан.

Зерттеу барысында адамдардың еркіндігі мен көңіл күйі де сұралды. Тұрғындардың 84 пайызы өз өміріндегі таңдау еркіндігіне толық қанағаттанады. Сұралғандардың 68,6 пайызы кешегі күнін күлкімен және жақсы көңіл күйде өткізгенін жеткізді. Уайым мен қайғыға салынған адамдардың үлесі небәрі 10 пайызды құрады.

Зерттеушілердің мәліметінше Ауғанстандағы жағдай жыл сайын нашарлап бара жатыр. Ал Қазақстанда өмір сапасын оң бағалау динамикасы 2019 жылдан бастап тұрақты өсіп келеді. Бұл кезең елдегі президенттің ауысуымен тұспа-тұс келген.