Қонаевта көпқабатты үйдегі пәтерде газ жарылды: зардап шеккендер бар

Алматы облысы Қонаев қаласында көпқабатты тұрғын үйдегі пәтерде газ-ауа қоспасы жарылған, деп хабарлайды Politico.kz.

Оқиға Қонаев қаласындағы төрт қабатты тұрғын үйдің төртінші қабатындағы пәтерде болған.

Оқиға орнына Алматы облыстық төтенше жағдайлар департаментінің күштері мен құралдары жедел түрде жіберілді.
Екі адам жарақат алып, Қонаев қалалық аудандық ауруханасына жеткізілді.

Жарылыс салдарынан пәтердің ішкі қабырғалары, сондай-ақ есік пен терезе ойықтары зақымданған.

Қалалық әкімдіктің мәліметінше, жарылыс болған пәтер табиғи газ жүйесіне қосылмаған. Басқа пәтерлер қосылған.

Ауруханаға түскен 2 азаматтың жағдайы қалыпты, орташа жағдайда, дәрігерлердің бақылауында.

Зардап шеккендерге заң аясында қажетті көмек көрсетіледі.

Алматы облысы газ жарылысы Қонаев қаласы