Қоқыс өткізіп, үй жөндеуге ақша жинау жобасын елге тарату ұсынылды

Құрылтай депутаты Аслан Құлмағамбетов қоқысты сұрыптап, одан түскен ақшаны үй қажетіне жұмсауға мүмкіндік беретін жобаны бүкіл Қазақстанға таратуды ұсынды. Ол бұл туралы премьер-министр Олжас Бектеновке жолдаған депутаттық сауалында айтты, деп хабарлайды Politico.kz.

Депутаттың мәліметінше, Астанадағы «Таза үй – Таза ел» жобасына 70-тен астам көппәтерлі тұрғын үй кешені қатысып жатыр, тағы 150-і қосылмақ. Белсенді тұрғындар мен мүлік иелері бірлестіктерінің төрағалары айына 2 тоннаға дейін картон жинап, шамамен 70 мың теңге табады. Ақша бірлестіктің шотына түсіп, үй жөндеуге, ауланы абаттандыруға, балалар және спорт алаңдарын жабдықтауға жұмсалады.

Жобаны «Таза Қазақстан» бастамасы аясында Жалпыұлттық социал-демократиялық партия «Жасыл Даму» АҚ және Тұрғын үй-коммуналдық шаруашылық қауымдастығымен бірге іске асырып келеді.

Алайда оны кеңейтуге бірнеше кедергі бар. Депутаттың айтуынша, қайта өңдеуге өткізілген қалдықтан түскен табысқа корпоративтік табыс салығы салынады. Қоқыс жинаушылар арнайы екі бөлікті жәшіктерге 300–700 мың теңге, фандоматтарға кемінде 10 млн теңге жұмсайды, бірақ шығынның қашан өтелетіні белгісіз. «Жасыл Даму» тек тасымалды субсидиялайды, ал жабдық сатып алуға қаржы бөлінбейді. Әкімдіктердің белсенділігі де төмен, ортақ жоспар жоқ.

Құлмағамбетов мемлекет инфрақұрылым мен тасымалды қолдап, тұрғындар қоқысты сұрыптауға, ал бизнес оны жинап, өңдеуге жауапты болуы керек деп есептейді. Оның пікірінше, әр қатысушының міндеті мен жауапкершілігін нақтылау қажет.

ОСДП фракциясы «Таза үй – Таза елге» 2027 жылдан бастап ұлттық жоба мәртебесін беруді ұсынды. Үкіметке нақты жоспар мен нәтиже көрсеткіштерін бекіту, Экология министрлігіне жабдықтарды қаржыландыру тетігін әзірлеу ұсынылды. Ал Ұлттық экономика министрлігінен мүлік иелері бірлестіктерін корпоративтік табыс салығынан босату жолдарын қарастыру сұралды.