Қосшыда жаттығу кезігде 10 жасар қыз қайтыс болды
Ақмола облысына қарасты Қосшы қаласында орналасқан қоғамдық мәдени-спорт кешенінде сабақ барысында 10 жасар қыз қайтыс болды, деп хабарлайды Politico.kz.
Белгілі болғандай, марқұм бронхиалды демікпе диагнозымен диспансерлік есепте тұрған. Сабақ кезінде баланың жағдайы кенеттен нашарлап, жедел жәрдем шақырылған. Алайда бригада келгенге дейін жағдайы күрт ауырлап кеткен.
Көрсетілген медициналық көмектің нәтижесіне қарамастан, баланы аман алып қалу мүмкін болмады.
Облыстық денсаулық сақтау басқармасының мәліметінше, 29 қаңтарда баланың басы ауырып, жүрегі айнып жатқаны туралы қоңырау түскен. Баланың жағдайының күрт нашарлауы туралы екінші қоңыраудан кейін қоңырау дереу төтенше жағдайға ауыстырылды, ал жедел жәрдем мүмкіндігінше тез барды.
«Медицина қызметкерлерінің барлық күш-жігеріне қарамастан, баланы құтқару мүмкін болмады», - делінген мәлімдемеде.
Қайғылы оқиғаға қатысты облыстық полиция департаменті пікір білдірді.
«Кәмелетке толмаған баланың қайтыс болу фактісі Қосшы қаласының полиция бөлімінде тіркелді. Қазіргі уақытта болған оқиғаның барлық мән-жайын анықтауға бағытталған тергеу іс-шаралары жүргізіліп жатыр. Алдын ала мәліметтерге сәйкес, сабақ барысында кәмелетке толмаған баланың денсаулық жағдайы нашарлаған. Тексеру қорытындысы бойынша түпкілікті процессуалдық шешім қабылданады», – делінген полиция хабарламасында.
Соңғы жаңалықтар
