Шымкентте көші-қон қызметінің басшысы сотталып, полициядағы бірқатар шенді жазаланды

Шымкентте бірнеше рет пара алды деп айыпталған қалалық көші-қон қызметі басқармасы басшысының міндетін атқарушы Жеңіс Әуелбековке сот үкімі шығып, артынан полиция департаментінде қатаң кадрлық шешімдер қабылданды, деп хабарлайды Politico.kz сайты kozachkow телеграм арнасына сілтеп.

Қаланың қылмыстық істер жөніндегі мамандандырылған ауданаралық сотының шешімімен ол кінәлі деп танылып, оған 24,5 млн теңге көлемінде айыппұл салынды. Сонымен қатар істі болған экс-басшы полиция полковнигі арнайы атағынан және мемлекеттік қызметте жұмыс істеу құқығынан өмір бойына айырылды. Еске сала кетейік, биыл маусым айында Ұлттық қауіпсіздік комитетінің қалалық департаменті аталған лауазымды тұлғаның ұсталғаны туралы мәлімдеген болатын.

Бұл қылмыстық іс пен тиісті тексерістерден кейін полиция жүйесіндегі бірқатар басшы тәртіптік жауапкершілікке тартылды. Жемқорлық көріністерінің алдын алуда қызметтік міндеттерін тиісінше орындамағаны үшін кадр бөлімінің бастығы, өзіндік қауіпсіздік басқармасының жедел уәкілі және жеке құраммен жұмыс жөніндегі бөлімше басшысы жазаланды. Ал полиция департаменті бастығының орынбасарына қызметке толық сәйкес келмеуі туралы ескерту берілді. Бұдан бөлек Ішкі істер министрлігі жүргізген арнайы тексеріс нәтижесінде көші-қон заңнамасы саласындағы заңбұзушылықтар анықталып, көші-қон қызметінің аудандық бөлімшелерінің басшылары қызметтен босатылды.

Бұл соңғы алты ай ішінде Шымкенттің көші-қон қызметі басшылығына қатысты шыққан екінші үкім болып отыр. Осыған дейін мамыр айында басқарма бастығының орынбасары Нұрлан Сембаев қаладағы компаниялардың бірінен құрылыс материалдары түрінде пара алғаны үшін сотталып, оған 2,6 млн теңге айыппұл салынған еді. Сәйкесінше бұл соңғы оқиғалар өңірдегі құқық қорғау органдары мен мемлекеттік құрылымдардың жемқорлыққа қарсы іс-қимыл саласындағы қызметі жіті бақылауда екенін аңғартады.