Шымкентте тағы бір әйелді пышақтап кетті: күдіктіні ұстау кезінде полицейлер қару қолданды

28 қаңтарда Шымкентте жолда кетіп бара жатқан әйелді ер адам пышақтап кеткен, деп хабарлайды Politico.kz.

Әйел оқиға орнында алған жарақаттарынан көз жұмды.

Қалалық полиция департаментінің мәліметінше, күдікті жәбірленушіге өзара араздық негізінде пышақ жарақаттарын салған.

Оқиға туралы полицияға куәгерлер хабарлаған.

«Полицейлер күдіктіні ізін суытпай ұстады. Ұстау кезінде қарулы күдікті қарсылық көрсеткендіктен, қолданыстағы заңнама талаптарына сәйкес полиция қызметкерлері табельдік қаруды қолдануға мәжбүр болды», - делінген полиция хабарламасында.

Күдікті қазір ауруханада. Ол полиция күзетінде.

Полиция бұл факті бойынша Қылмыстық кодекстің «Адам өлтіру» бабымен қылмыстық іс қозғады. Тергеу жүріп жатыр.

Адам өлімі Полиция Шымкент қылмыс