Сізді ұнатпайтын адамдармен қарым-қатынас құрудың алтын ережесі

Психологтар сізді ұнатпайтын адамдармен қалай дұрыс қарым-қатынас жасау керектігін түсіндірді

Адам болған соң, айналамыздағы жұрттың бәріне бірдей жаққымыз келетіні рас. Біреудің қырын қарағаны немесе салқын сөзі көңілге қаяу салып, «қай жерден қате жібердім екен?» деген ойға жетелейді. Алайда психологтар бұлай уайымдаудың қажеті жоқ екенін, керісінше, бәріне ұнауға тырысу – күйзеліске апаратын төте жол екенін ескертеді.

Мамандардың пікірінше, ең алдымен қарапайым шындықты қабылдаған жөн: біз мінсіз емеспіз және бәріне бірдей ұнау міндетті емес. Көбіне біреудің сізге деген теріс көзқарасы сіздің кемшілігіңізден емес, сол адамның ішкі мәселелерінен туындайды. Мүмкін ол іштей күйзеліп жүрген болар, я болмаса сіздің жетістігіңізге қызғанышпен қарайтын шығар. Адамдар көбіне өз қорқынышы мен комплекстерін өзгелерге таңатынын ұмытпаңыз.

«Сұр тас» әдісін қолданыңыз

Сізді ұнатпайтын немесе жағымсыз пікір айтатын адаммен қалай сөйлесу керек? Ең дұрысы – сабыр сақтау және бейтарап болу. Ақталудың немесе жағынудың қажеті жоқ, бұл тек қақтығысты ушықтырады. Психологияда «сұр тас» (серый камень) деген әдіс бар. Яғни, эмоцияға берілмей, қысқа әрі сыпайы жауап қайтарыңыз. Сізді ашуландырғысы келген адамға ешқандай "жем" тастамаңыз. Бұл дөрекілік емес, бұл – өзіңізді қорғау тәсілі.

«Жоқ» деп айтудан қорықпаңыз

Өз шекараңызды қорғай біліңіз. Егер әңгіме сізге жағымсыз арнаға бұрылса, ұялмастан: «Бұл тақырыпты қозғамай-ақ қояйық» немесе «Маған мұндай әңгіме ұнамайды» деп кесіп айтыңыз. Өзіңізді кінәлі сезінудің қажеті жоқ. Сіздің жан тыныштығыңыз сыпайылық ережелерінен әлдеқайда маңызды.

Егер сізді мүсіркеп немесе борышкер сезіндіріп манипуляция жасағысы келсе, «ескі пластинка» техникасын қолданыңыз. Басы артық сөз таластырмай, дауласпай, өз ұстанымыңызды байыппен қайталай беріңіз. Нәтижесінде манипулятор өз әдісінің іске аспайтынын түсініп, кері шегінеді.

Түйін

Өзгенің ойын өзгертемін деп әуре болмаңыз. Одан да сол қуатыңызды өзіңізді дамытуға және сізді шын бағалайтын, құрметтейтін жандарға арнаңыз. Нағыз кемелдік – жұрттың бәріне жақсы көріну емес, кез келген ортада өзің болып қалу.