СПОРТ САЛАСЫНДА 39 ЖЕМҚОРЛЫҚ ҚЫЛМЫСЫ АНЫҚТАЛДЫ

  Сыбайлас жемқорлыққа қарсы агенттік жыл басынан бері спорт саласында 39 жемқорлық қылмысын тіркеді. Тек соңғы 6 жылда отандық спортқа бөлінетін бюджет 2 есе өсіп, 1,4 трлн теңгеге жетсе де, еліміздің әлемдік спорттағы рейтингі төмендеуде. Бұл жайында агенттік төрағасы Асхат Жұмағалидің басшылығымен өткен ведомствоаралық отырыста айтылды. Тіпті, «Спорт шебері» жалған атағын беру фактілері анықталған. Ал екі жыл бұрын жоспарланған «Е-sport» ақпараттық жүйесі осы уақытқа дейін іске қосылған жоқ. Асхат Жұмағали, ҚР Сыбайлас жемқорлыққа қарсы іс-қимыл агенттігінің төрағасы: - Құрметті әріптестер, өздеріңіз білетіндей, бұл айқын шындық. Бұқаралық спорт бұл бүкіл спортты дамытудың және дені сау ұлт құрудың негізі. Бірақ іс жүзінде барлығы керісінше. Жоғары жетістіктер спортында ашық емес және субъективті төлемдер бақылауы тиісті жүргізілмейді. Жалған құрамалар құру және қосарлы қаржыландыру үшін жағдайлар жасалған.