Теміртауда балабақшада тәрбиеші баланы жұдырықпен ұрған (ВИДЕО)

Қарағанды облысы, Теміртау қаласындағы «Айгөлек» балабақшасында тәрбиеші тарапынан балаға қол көтеру фактісі тіркелді, деп хабарлайды Politico.kz.

Оқиға бейнебақылау камераларына түсіп қалған. Кадрларда тәрбиешінің баланың бетіне бірнеше рет соққы жасағаны байқалады. Бұл жағдай әлеуметтік желілерде тарағаннан кейін қоғамда үлкен резонанс тудырды.

Баланың анасы бұл оқиғаға қатысты пікір білдіріп, балалардың балабақшада қорғалған, қауіпсіз ортада болуы тиіс екенін, ал мұндай жағдайлар мүлдем қабылданбайтынын айтты. Оның сөзінше, балаға қорқыныш емес, қамқорлық пен қолдау көрсетілуі қажет.

Оқиғадан кейін 36 жастағы тәрбиеші ұсталып, полиция бөлімшесіне жеткізілді. Айта кетейік, бұл жағдай бойынша ата-аналар тарапынан полицияға ресми арыз түспеген. Құқық қорғау органдары аталған дерек бойынша қылмыстық іс қозғады. Полицияның мәліметінше, іс Қылмыстық кодекстің «Кәмелетке толмаған баланы тәрбиелеу жөніндегі міндеттерді қатыгездікпен қатар орындамау немесе тиісінше орындамау» бабы бойынша тергеліп жатыр. Қазіргі уақытта оқиғаның барлық мән-жайы анықталуда.

Сонымен қатар, Теміртау қалалық білім бөлімі бұл жағдайға байланысты арнайы комиссия құрылғанын және балабақша қызметіне қатысты жан-жақты қызметтік тексеріс басталғанын мәлімдеді.