Тоқаев футбол клубтарын жекешелендіруді тездетуді тапсырды: Белгілі кәсіпкерлер төрт клубты өз қарамағына алмақ

Президент Қасым-Жомарт Тоқаев бүгінгі Жолдауында төрт кәсіби футбол клубы жеке инвесторлардың басқаруына берілетінін мәлімдеді, деп хабарлайды POLITICO.KZ.

«Футбол клубтарын жекешелендіруге қатысты жұмысты тездету керек. Қазір еліміздің төрт футбол клубына белгілі кәсіпкерлеріміз ие болды, яғни, клубтар жекеменшікке өтіп жатыр. Сол үшін оларға ризашылығымды білдіремін. Дегенмен футболды коммерцияландыру ісін жалғастыра беру керек. Мұндай қадамсыз Қазақстанда футбол дамымайтынын әлемдік тәжірибеден көріп отырмыз», - деді Тоқаев

Алдын ала мәлімет бойынша, қарағандылық «Шахтер» клубын – Тимур Турлов, елордалық «Жеңісті» – Михаил Ломтадзе, петропавлдық «Қызылжарды» – Сергей Кан өз қарамағына алады. Ал қызылордалық «Қайсарға» жас кәсіпкер Исламғали Қозбақов инвестиция құймақ. Келісімшарт бойынша ол шамамен 12 миллиард теңгеге заманауи футбол академиясын салуды жоспарлап отыр.