Тоқаев Қауіпсіздік Кеңесінің шұғыл отырысын өткізді

Президент Қасым-Жомарт Тоқаевтың төрағалығымен Қазақстан Республикасы Қауіпсіздік Кеңесінің шұғыл отырысы өтті, деп хабарлайды Ақорданың баспасөз қызметі.

Жиында Ұлттық қауіпсіздік комитетінің төрағасы Ермек Сағымбаев, Ішкі істер министрі Ержан Сәденов және Бас прокурор Берік Асылов қазіргі халықаралық жағдайды ескере отырып, экстремизм мен терроризмге қарсы әрекет етудің өзекті мәселелері жөнінде баяндады. Отырыс барысында құқық қорғау және арнайы органдар қызметінің терроризмге қарсы күресті күшейту бойынша түрлі аспектілері қарастырылды. Мемлекет басшысы ел азаматтарының қауіпсіздігін қамтамасыз ету шараларын арттыруға бағытталған бірқатар нақты тапсырма берді. Айта кетейік, Президент бүгін ХХХІІІ жазғы Олимпиада ойындарының жүлдегерлерімен кездесіп, спорттың олимпиадалық түрлерін дамыту ісінде кешенді реформа қажет екенін айтқан болатын. Фото: Ақорда

#Ақорда #Басты ақпарат #отырыс #Президент #Тоқаев #Қауіпсіздік кеңесі