Түркістан облысында қоқыстан жаңа туған нәресте табылды

Түркістан облысының Кентау қаласында аулалардың бірінен жаңа туған нәрестенің мүрдесі табылды, деп хабарлайды POLITICO.KZ.

Облыстық полиция департаментінің мәліметінше, қазір сәбидің анасын анықтауға бағытталған жедел-іздестіру шаралары жүргізіліп жатыр.

Полиция таратқан фотосуретте сәбидің денесі қоқыс жәшігінің жанында жатқанын көруге болады.

«Полицейлер аулааралық аумақтарды аралап, бейнебақылау жазбаларын қарап, жақын маңдағы үйлердің тұрғындарымен және куәгерлермен сұхбаттасып жатыр», — деп мәлімдеді Түркістан облысы ПД.

Ведомствоның хабарлауынша, медициналық мекемелер де кешенді тексерістен өтуде.

Оқиғаның толық мән-жайын анықтау үшін қажетті тергеу әрекеттері жүргізіліп жатыр. Тергеу қорытындысына сәйкес заң аясында тиісті шешім қабылданады.