"Туыстары бөтенсіді". Сая Оразғалиева не үшін ажырасқанын айтты

Танымал отандық актриса Сая Оразғалиева екінші некесінің ажырасумен аяқталу себептері туралы ашық айтты. Ол өз сұхбатында қоғам пікірі, отбасылық өмірдегі келіспеушіліктер және бұл шешімді қабылдаудың неліктен оңай болмағанын түсіндірді., деп хабарлайды Politico.kz.

Бұл туралы Сая Оразғалиева «Мамский әңгіме» подкастында әңгімеледі.

Актрисаның сөзінше, ажырасу туралы шешімді кейінге қалдыруға қоғамның қысымы мен балаларды әкесіз қалдыру қорқынышы басты себеп болған.

«Бұл – менің екінші некем еді. Қайдағы бір біреудің сөзі мен өзгелердің пікірі маған маңызды емес деп айтқаныммен, қоғамның қысымы, «ағайын-туған не дейді?» деген ой бәрібір адамды мазалайды екен. Бірақ мен үшін ең басты қорқыныш – балаларымды әкесіз қалдыру еді. Мұндай жағдай Радмирмен болған. Сондықтан бұл шешімге бұрыннан келе алмауымның басты себебі – осы үрей болатын. Отбасын сақтап қала алмадым, балаларыма толыққанды отбасы сыйлай алмадым деп, өзімді жауапсыз сезініп, іштей жегідей жедім», – деді актриса.

Сонымен бірге өнер иесі бұл қадамға баруды бұрыннан ойластырғанын және бұрынғы күйеуінің туыстары өзін қуана қабылдамағанын жасырмады.

«Шындығында, мұндай шешімге баяғыда-ақ келгенмін, тек батылым жетпей жүрді. Өйткені біздің қарым-қатынасымыз ең басынан-ақ дұрыс өрбімеді. Біреуді жамандап, біреуге кінә артқым келмейді, өйткені әр отбасының өз мәселесі бар. Жасыратыны жоқ, оның жақындары мені қуана қабылдай қоймады. Мұны түсінуге де болады, себебі кез келген ата-ана өз баласына ең жақсысын қалайды. Ал мен ол кезде ажырасқан, баласы бар, актриса, танымал әрі ұлтымыз да әртүрлі еді. Қысқасы, арамыздағы қарым-қатынас басынан-ақ оңай болмады. Соған қарамастан, біз бәріне төтеп беріп, отбасын құруға тырыстық. Алайда уақыт өте келе көзқарасымыз бен болмысымыздың екі бөлек екенін анық түсіндім. Дегенмен балаларымның өмірге келгеніне ешқашан өкінбеймін. Өйткені некеге өкінсем, сол некеден туған сүйкімді де асыл балаларыма да өкінгендей болады екенмін. Бақытыма орай, олар аман-есен өсіп келеді. Демек, бәрі де осылай болуы керек болған. Бұл адам – балаларымның әкесі, оған айтар алғысым шексіз, жақсы адам. Бірақ, өкінішке орай, екеуіміздің жолымыз екі айырылды», – деді Сая Оразғалиева.

Сая Оразғалиева бұрынғы жұбайы екеуінің отбасылық өмірге деген түсініктері мен болашаққа құрған жоспарлары мүлде сәйкес келмегенін атап өтті.

«Біз отбасымызды сақтап қалуға тырыстық. Бірақ бірде өзгелердің отбасы туралы, болашаққа құрған жоспарлары мен армандарын шабыттана айтып отырғанын естігенде, бойымды өкініш кернеді. Өйткені бізде ондай ортақ арман да, болашаққа деген жоспар да, тіпті бірге саяхаттау туралы ортақ пікір де болмаған екен. Сол кезде ол да, мен де бұл некеде бақытсыз екенімізді ұқтым. Оның отбасы туралы түсінігіне, талаптарына мен ешқашан сай келе алмайтын едім, ал ол маған сай болмады. Оған дәстүрлі көзқарастағы отбасылық өмір керек еді. Оның қайтадан отбасын құрып, жаңа жары үшін ең керемет күйеу болатынына кәміл сенімдімін. Жай ғана біз екі бөлек адамбыз, екеуімізге де мүлде басқа серік керек болды», – деді жұлдыз.

Сондай-ақ актриса екінші рет тұрмысқа шығу асығыс шешім болғанын және уақыттан кешігу қорқынышы таңдауға әсер еткенін мойындады.

«Бұған қоса, қоғамның да әсері аз болған жоқ. Он жыл бойы жалғыз жүргендіктен, басымда «қайтадан отбасын құруым керек, балалы болуым керек» деген ой берік орнап қалған еді. Үлкен ұлым Радмирді жас кезімде босандым, қазір ол 17-де. Содан кейін қайтадан ана атануға үлгермей қаламын ба деп қорықтым. Шамасы, осындай асығыстық пен қорқыныштың кесірінен кезінде бірқатар қате шешім қабылдап алған сияқтымын. Қайтадан балалы болғым келгені сонша, болашақ балаларымның әкесін таңдауға аса жауапкершілікпен қарау керектігін ескермей кетіппін. Дегенмен, бұрынғы жолдасым туралы жаман сөз айтқым келмейді, ол – жақсы адам. Тек екеуіміздің мінезіміз бен өмірлік көзқарасымыз әртүрлі болды, мұны бір шаңырақ астында бірге тұрғанда ғана анық түсіндік», – деді Сая Оразғалиева.