Wi-Fi роутерді түнде не үшін сөндіру керек?

Сарапшылар Wi-Fi роутерін не үшін сөндіру керектігін және оның қауіпсіздікке әсерін түсіндірді, деп хабарлайды Politico.kz.

Мамандар жеке деректерді қорғау және электр энергиясын үнемдеу мақсатында роутерді қажетсіз уақытта сөндіріп жүруге кеңес берді. Бұл қарапайым әрекет цифрлық қауіпсіздікті күшейтуге және отбасылық бюджетті сақтауға тікелей ықпал етеді.

Қазіргі таңда сымсыз интернет күнделікті тұрмыстың ажырамас бөлігіне айналғанымен оның тұрақты жұмыс істеуі белгілі бір қауіптер тудырады. Көпшілік назардан тыс қалдыратын маршрутизаторлар зиянкестер үшін оңай олжаға айналуы мүмкін. Әсіресе зауыттық құпия сөзі мен желі атауы өзгертілмеген құрылғылар өте осал келеді. Мұндай жағдайда сигнал таралу аймағындағы кез келген адам үй желісіне қосылып жеке деректер мен интернетке байланған өзге де гаджеттерге қол сұғу мүмкіндігіне ие болады.

Тағы бір маңызды фактор электр энергиясын тұтынуға қатысты. Интернет қолданылмаса да роутер тоқ қуатын жұмсауды жалғастыра береді. Егер кабельдік байланыс бар болса сымсыз функцияны өшіру артық шығынды азайтуға септігін тигізеді. Жылдық есеппен қарағанда бұл айтарлықтай үнемдеуге әкеледі. Әсіресе үйде бірнеше осындай құрылғы болса оның нәтижесі айқын байқалады.

Мамандар интернеттің үзіліссіз қолжетімді болуы ұйқы режиміне кері әсер ететінін ескертеді. Әсіресе балалар мен жасөспірімдердің тынығуына кедергі келтірмеу үшін түнде Wi-Fi желісін ажыратқан дұрыс. Бұл алаңдататын факторларды азайтып қана қоймай түнгі уақытта желіде мақсатсыз отыруды шектеп тәртіпке баулиды. Сонымен қатар түнде үй тұрғындары ұйықтап жатқанда желі бақылаусыз қалады. Осы сәтте роутерді сөндіру кибершабуылдар мен рұқсатсыз қосу әрекеттерінің алдын алады.

Қазіргі заманғы маршрутизатор өндірушілері желіні басқарудың бірнеше жолын қарастырған. Көптеген модельдерде сигнал таратуды лезде тоқтататын арнайы түйме бар. Егер ондай тетік болмаса браузер арқылы құрылғының баптауларына кіріп сымсыз байланыс бөлімінен тиісті функцияны өшіру қажет. Бұл тәсілдер қолжетімсіз болған жағдайда ең сенімді әдіс роутерді тоқ көзінен ажырату болып саналады. Бұл құрылғының келесі қосылғанға дейін жұмыс істемейтініне және желіге ешкімнің жасырын қосыла алмайтынына кепілдік береді.

Айта кетейік Wi-Fi желісін өшіру интернет үшін төленетін абоненттік төлемнен босатпайды. Дегенмен бұл шара жеке ақпаратты қорғауға және энергия шығынын бақылауға мүмкіндік береді. Сарапшылар қауіпсіздікті барынша қамтамасыз ету үшін құпия сөздерді жиі ауыстырып маршрутизатордың бағдарламалық жасақтамасын уақытылы жаңартып отыруды ұсынады.