Жетісуда Бас прокуратура комитетінің қызметкерлері ұсталды

ҚР Ұлттық қауіпсіздік комитеті Жетісу облысы бойынша Бас прокуратураның Құқықтық статистика және арнайы есепке алу жөніндегі комитет басқармасы қызметкерлерінің құрықталғанын ресми түрде растады, деп хабарлайды Politico.kz порталы «ҚазАқпарат» агенттігіне сілтеме жасап.

Құзырлы органның хабарлауынша, қазіргі уақытта аталған дерек негізінде сотқа дейінгі тергеп-тексеру амалдары жүргізіліп жатыр. Қылмыстық-процестік кодекстің 201-бабының 1-бөлігіне сәйкес, тергеу мүддесі үшін істің өзге мән-жайы жариялауға жатпайды.

Айта кетейік, бұған дейін әлеуметтік желілерде, оның ішінде Telegram арналарында Тәуелсіздік күні мерекесінің қарсаңында аталған ведомство өкілдерінің қамауға алынғаны жөнінде ақпарат тараған болатын.

Сондай-ақ, тергеу шараларының орбитасына Алматы облыстық лицензиялық-рұқсат беру жүйесінің қызметкерлері де ілігуі мүмкін екендігі айтылған еді. Әзірге ресми органдар іс бойынша басқа егжей-тегжейлі деректерді ашып айтқан жоқ.