Адам кіре алмайтын дәретханалар үшін жол компаниясының бастықтары жұмыстан қуылды

Көлік министрлігі республикалық маңызы бар автожолдардағы сервис нысандарын тиісті деңгейде күтіп ұстамағаны үшін «ҚазАвтоЖол» ұлттық компаниясының бірқатар басшысы жауапқа тартылғанын мәлімдеді, деп хабарлайды Politico.kz.

Ведомствода жол саласының көктемгі құрылыс маусымына дайындығы пысықталған жиын өтіп, онда азаматтардан түскен шағымдар негізінде күрежол бойындағы дәретханалардың жай-күйі қаралды. Арнайы сапа орталығы 600 астам санитарлық торапты тексеріп, оның ішінде 13 нысанның мүлдем жұмыс істемейтінін және 69 дәретхананың тазалық талаптарына сай келмейтінін анықтаған. Осы олқылықтарға байланысты Ақмола облысындағы «ҚАЖ-Сервис» мекемесі филиалының басшысы қызметінен босатылып, бақылауды уақытылы жүргізбегені үшін «ҚазАвтоЖол» компаниясының бірнеше жауапты тұлғасына тәртіптік жаза қолданылды.

Бұдан бөлек жиында автожолды қайта құру және жөндеу жұмыстары мен су тасқыны кезеңіне дайындық барысы талқыланды.