Алматыда бұрынғы полицей есірткі қылмысы бойынша тергеліп жатыр

Алматы қаласында жоғары лауазымды бұрынғы полицейге қатысты қылмыстық іс тергеліп жатыр, деп хабарлайды POLITICO.KZ.

ҚР Ішкі істер министрлігі бұрынғы Алматы қалалық полиция департаменті есірткі қылмысына қарсы іс-қимыл басқармасы бастығының орынбасары Асқар Жетегеновтың есірткі дайындау және сатуға байланысты іске қатысы барын растады.

"Қазіргі уақытта Бас прокуратураның ведомствоаралық тергеу-оперативтік тобы Қылмыстық кодекстің 297-бабының 3-бөлігі, 1 және 3-тармақтары бойынша сотқа дейінгі тергеу жүргізуде. Бұл бап заңсыз есірткі дайындау, өңдеу, сатып алу және сату, сондай-ақ аса ірі көлемде алдын ала сөз байласқан топпен қылмыс жасауды қамтиды", – делінген ҚР ІІМ баспасөз қызметінің жауабында.

Министрлік мәліметінше, Асқар Жетегенов 2024 жылғы қазан айында кезектен тыс аттестаттау нәтижесінде өз лауазымына сай еместігі анықталып, қызметінен босатылған.

"Ішкі істер органдарындағы қызмет әрбір қызметкерден жоғары кәсібилікті және жеке адалдықты талап етеді. Біздің министрлік өз қатарларын жүйелі түрде адал емес қызметкерлерден тазартып, қызметтің ашықтығын және жоғары стандарттарын қамтамасыз етеді", – деп атап өтті ІІМ.