«Ақша табуды үйретсеңіз жөн болар еді»: Кәмшат Жолдыбаева бастамасы желіде дау тудырды

Танымал әнші Кәмшат Жолдыбаева әлеуметтік желіде жариялаған видеосымен көпшіліктің назарын аударды. Өнер иесі әйелдерге арналған арнайы кездесулер ұйымдастырып, бір ай бойы таңдалған қатысушылармен жұмыс істеуді жоспарлап отырғанын айтты, деп хабарлайды Politico.kz

Әншінің сөзінше, ол қыз-келіншектерге арналған топ құрып, әйел болмысының сұлулығын ашуға бағытталған әңгімелер мен түрлі практикалық сабақтар өткізбек.

— «Әдемі әйелдер қауымын жинап, тәніміздің, табиғатымыздың сұлулығын ашатын сырлы кездесулер жасағым келеді. Пайдалы кеңестер айтып, рухани қолдау көрсеткім келеді», — дейді Кәмшат.

Алайда бұл бастама желі қолданушылары арасында әртүрлі реакция тудырды. Кейбірі әншіні қолдап, ниетіне сәттілік тілесе, енді бірі сын айтып, күмән келтірген.

Пікір қалдырғандар арасында:

«Өзі не істеп жүргенін білмей жүрген сияқты», «әркім өз жолын өзі таңдайды», «ақша табуды үйретсеңіз дұрыс болар еді», «бағасы тек байларға арналған болса, бізге мүмкіндік жоқ қой» деген жазбалар да кездеседі.