Астанада стоматологиядағы бала өлімінен кейін клиника басшысы жаңа орталық ашқан

Қайтыс болған қыз оқиғасынан кейін клиника жаңа орталық ашқан, деп хабарлайды Politico.kz сайты Tengrinews.kz сайтына сілтемемен.

Астанада үш жастағы қыздың 18 тісін емдеу кезінде көз жұмғаны туралы резонанс тудырған іс қоғамда ұзақ уақыт талқыланған еді. Осы жағдайға қатысты жаңа мәліметтер белгілі болды. Әлеуметтік желілерде тараған ақпаратқа сәйкес, аталған оқиға болған жекеменшік клиниканың басшылығы жаңа стоматологиялық орталық ашқан. Бұл хабарлама желі қолданушылары арасында қызу пікірталас тудырды.

Жаңа медициналық орталықтан ресми түсініктеме алынды. Онда мекеменің бұрынғыдай сол бір заңды тұлға (ЖШС) арқылы жұмысын жалғастырып жатқаны айтылған. Сонымен қатар қазіргі таңда клиникада жалпы анестезия (наркоз) қолданылатын қызметтер көрсетілмейтіні хабарланды. Мекеме өкілдері медициналық қызмет сапасы мен қауіпсіздігіне ерекше көңіл бөлінетінін жеткізді.

Айта кетейік, бұл іс бойынша айыпталған анестезиолог сот үкіміне шағым түсірген. Ал Денсаулық сақтау министрлігі мен Астана қаласындағы медициналық және фармацевтикалық бақылау департаментінен ресми жауап әзірге түскен жоқ.