"Құрбандар саны - 15": Әйел 20 жылдан аса уақыт бойы күйеулерін улап келген

Иранда 56 жастағы Колсум Акбари есімді әйелге қатысты атышулы сот процесі өтіп жатыр. Ол 20 жылдан астам уақыт бойы егде жастағы ер адамдарға тұрмысқа шығып, оларды улап өлтіріп, мүліктерін иемденген деп айыпталуда. Бұл туралы Oddity Central хабарлайды.

Тергеу дерегінше, 2000 жылдан бері Акбари кемінде 11 ер адамды улап өлтірген. Алайда ол жауап алу кезінде құрбандарының саны бұдан да көп болуы мүмкін екенін айтып, «13 немесе 15 шығар, нақты есімде жоқ» деп мәлімдеген.

Әйелдің әрекет ету тәсілі бірдей болған: ол қант диабеті мен гипертонияға қарсы дәрілерді, ұйықтататын препараттарды және өнеркәсіптік спиртті араластырып, күйеулеріне ішкізген. Кей жағдайларда улану өлімге әкелмесе, жәбірленушіні жастықпен тұншықтырып өлтірген. Прокурорлардың айтуынша, қылмыстың басты мақсаты – ер адамдардың мұрасына ие болу болған. Жиі жағдайда мүлік оның қызының атына рәсімделген.

Колсум Акбари өте сақ қимылдаған: әр жолы жаңа қалаға көшіп, күдік туғызбауға тырысқан. Қарт ерлердің өлімі денсаулығының нашарлығымен түсіндіріліп, ұзақ уақыт бойы күдік тудырмаған.

Оның қылмыстары 2023 жылы ғана әшкереленді. Соңғы күйеуі – 82 жастағы Голамрез Бабаея қайтыс болғаннан кейін, марқұмның ұлы полицияға жүгінді. Шешуші сәт – марқұмның досы Акбариді бұрын өзінің әкесін улауға тырысқан әйел ретінде танып қойғаны болды.

Расталған құрбандардың арасында:

• 69 жастағы Мирахмад Омрани (2013 жылы үйленгеннен кейін бір айдан соң қайтыс болды);

• 62 жастағы Эсмаил Бахши (2016 жылы некеден кейін екі айдан соң көз жұмды);

• 83 жастағы Ганджали Хамзеи (некеден кейін екі айға жетпей қайтыс болды).

2020 жылы оның күйеулерінің бірі — Масих Немати уланудан аман қалған. Ол әйелді үйінен қуып шыққанымен, полицияға хабарламаған. Егер сол кезде құқық қорғау органдарына жүгінгенде, қылмыстардың жалғасы тоқтатылар еді.

Белгілі болғандай, Колсум алғашқы некесіне 18 жасында тұрған. Алғашқы күйеуі психикалық ауруға шалдыққандықтан, бұл неке тез аяқталған. Екінші күйеуі тым егде болып, әйелді ұрып-соғып, қорлаған. Дәл осы екінші күйеуінің қазасынан кейін қылмыстар тізбегі басталған.

Қазіргі таңда Колсум Акбариға 11 кісі өлтіру және бір кісі өлтіруге оқталу айыбы тағылған. Егер сот кінәсін дәлелдесе, оған өлім жазасы кесілуі мүмкін. Бұл іске қатысты 45-тен аса талапкер бар — олардың барлығы марқұм ерлердің мұрагерлері.

Соттың түпкілікті шешімі барлық куәларды тыңдап болған соң жарияланбақ.