Балабақшаға орналастыру: 2025-2026 оқу жылындағы жаңа ережелер

2025-2026 оқу жылына балабақшаға қабылдау ережелері: Қазақстанда балаңызды қалай орналастырасыз?

Қазақстанда 2025-2026 оқу жылына балабақша топтарын жасақтау қалай жүргізілетінін Оқу-ағарту министрлігі түсіндірді.

Ваучерлік қаржыландыру жүйесі енгізілген қалаларда (1 шілдеден бастап):

1 шілдеден бастап ваучерлерді тарату басталады. Бұл жүйе Тараз, Түркістан, Шымкент, Орал, Астана, Семей, Өскемен, Жезқазған, Қарағанды, Павлодар, Петропавл, Қостанай, Қонаев, Қосшы, Талдықорған қалаларында, сондай-ақ Байзақ, Сарыағаш, Жетісай, Сайрам, Қазығұрт және Мақтаарал аудандарында жұмыс істейді.

• Баланы балабақшаға орналастыру үшін ата-ана екі жұмыс күні ішінде ваучерге келісімін растауы қажет. Бұл мерзімде расталмаса, өтініш белсенділігін жояды. Ата-аналар немесе заңды өкілдер ваучерді 28 күнтізбелік күн ішінде бір рет қана қалпына келтіре алады.
• Әрі қарай, бес жұмыс күні ішінде балабақшаны таңдап, құжаттарды жинап, келісімшартқа қол қою керек. Ваучерден бас тартқан жағдайда кезек жойылады.
• Егер таңдалған мекемеде бос орын болмаса, ата-ана баланы «күту тізіміне» қоса алады. Орын босаған кезде жеке кабинетке хабарлама келеді.

Ваучерсіз қаржыландыру жүйесі қолданылмайтын өңірлер үшін (1 тамыздан бастап):

Бұл аймақтарда жас топтарын жасақтау 1 тамыздан басталады.

• «Бос орындар туралы хабарламаны кезекте бірінші тұрғандар алады. Ата-анада бағыттаманы растауға немесе одан бас тартуға екі күн бар. Егер бағыттама расталса, бес жұмыс күні ішінде құжаттарды тапсырып, келісімшарт жасасу қажет. Қажет болған жағдайда, бағыттама мерзімін бір рет 30 күнтізбелік күнге дейін ұзартуға болады», – деп түсіндірді Оқу-ағарту министрлігі.

Балабақша қабылдаудан бас тартуы мүмкін, егер:

• Құжаттар толық ұсынылмаса немесе мерзімі өткен болса.
• Егілмеген балалардың егілген балаларға қатынасы нормадан асып кетсе.

Балаларды топтарға жасақтау науқаны 31 тамызда аяқталады.