Белгілі өнер қайраткері өмірден өтті

Қобызшы, қазақтың алғашқы кәсіби музыкант қыздарының бірі Раушан Нұрпейісова 97 жасында дүниеден озды. Қайғылы хабарды журналист Дина Имамбай әлеуметтік желідегі жариялады, деп хабарлайды Politico.kz.

Раушан Түсіпбекқызы – әйгілі академик Ахмет Жұбановтың шәкірттерінің бірі. Ол ұзақ жылдар бойы Құрманғазы атындағы мемлекеттік академиялық халық аспаптар оркестрінде қобызшы болып еңбек еткен.

Өнер жолында ол белгілі қобызшылар Дәулет Мықтыбаев және Жаппас Қаламбаевпен бірге сахнада өнер көрсеткен.

1957 жылы Раушан Нұрпейісова Атырау қаласында музыкалық училищенің және Дина Нұрпейісова атындағы оркестрдің құрылуына үлес қосқан. Сонымен қатар оның есімімен қобызшыларға арналған арнайы байқау өткізіліп келеді.

Соңғы жылдары ол Астана қаласында ұлы – белгілі музыкант, мультиинструменталист Еділ Құсайыновтың қолында тұрған.

Ғасырға жуық ғұмыр кешкен Раушан Нұрпейісованың өмірі мен шығармашылығы қазақ музыкасының тарихында маңызды із қалдырды.