"Бензин құйып, әдейі өртеген" – Оралда денесі күйіп қайтыс болған баланың анасы

2025 жылдың 10 тамызы күні шамамен сағат 16:30-да Қонаев шағынауданы №55 үйдің ауласында болған қайғылы жағдай 8 жасар баланың өмірін жалмады.

Көлік жөндеп жүрген тұрғын көліктің жүксалғышында бензин құйылған канистраны қараусыз қалдырып кеткен. Балалар ойнап жүріп, сол канистраны тауып алып, ішіндегі жанармайды тұтатып жіберген. Нәтижесінде жарылыс болып, сол маңда жүрген Артем есімді бала өртке оранып, денесінің 95–96%-ын күйік шалды. Дәрігерлер оған 4-дәрежелі күйік диагнозын қойып, жансақтау бөліміне жатқызып, жасанды тыныс алу аппаратына қосты.

Артем жазғы демалыста Алматыдан Орал қаласына апасының үйіне барған болатын. Қайғылы жағдай туралы хабарды алғаш болып анасы Мухаббат естіген. Ол баласының күйіп қалғанын апасынан біліп, дереу ұшып келген. Артем есін білген сәтте анасына "мені өлтірмек болды" деп бірнеше рет қайталаған. Дәрігерлер баланың тыныс алу жолдарының да зақымданғанын айтып, қолдан келгеннің бәрін жасап жатқанын, бірақ жағдайының өте ауыр екенін жеткізген.

Бір апта өткен соң Артем ауруханада көз жұмды. Ресми мәлімет бойынша, полиция бұл жағдайды жазатайым оқиға ретінде тіркеп, тергеуді сол нұсқамен аяқтауға ниетті болған. Олардың дерегінше, Артем көліктің жүксалғышынан бензин құйылған канистраны шығарып, жанармайды төгіп, өзі тұтатқан. Алайда анасы Мухаббаттың айтуынша, бұл нұсқа шындыққа жанаспайды. Артем от қоймаған, керісінше оған от қойған басқа бала болған. Оқиға куәгерлерінің сөзінше, ойнап жүрген балалардың бірі, нақтырақ айтқанда 6 жастағы Тамерлан, Артемге бензин шашып, сіріңке тұтатқан.

Мұны көрген бірнеше қыз оқиғаның мән-жайын анасына келіп айтып берген. Жасөспірімдердің сөзіне қарағанда, сол сәтте аулада екі ересек адам да болған, бірақ полиция олардан да, басқа куәгерлерден де жауап алмаған. Тіпті баланың апасынан, алғашқы медициналық көмек көрсеткен жедел жәрдем қызметкерлерінен, "мені өлтірмек болды" деген сөзін естіген адамдардан да жауап алынбаған. Іс материалдарында бар болғаны үш адамның жауабы тіркелген: көлік жүргізушісі, Тамерлан және оқиғаға қатысы жоқ бала. Көліктің иесі де жарылыс сәтін көрмеген. Ата-анасының қолында өздері жинаған куәгерлік мәліметтер, аудиожазбалар мен көзбен көргендердің айғақтары бола тұра, құқық қорғау органдары бұл деректерді ескерусіз қалдырған. Артемнің ата-анасы баласын қайтара алмайтынын түсінеді, бірақ олар әділдік орнауын талап етеді. Қазіргі тергеу баланың өліміне өзін кінәлі етіп көрсетіп отыр, ал нақты от қойған баланың әрекеті жауапсыз қалып жатыр.

Ата-ана тергеудің толық, әділ әрі жан-жақты жүргізілуін, нақты куәгерлерден жауап алынуын, барлық сараптаманың қорытындысы есепке алынуын сұрайды. Олар полицияға істі қайта тергеуді талап етіп шағым түсірді, ал прокуратураға — полицияның әрекетсіздігі үшін арыз жазды. Бұл оқиға балалардың қауіпсіздігіне, ересектердің жауапкершілігіне және әділ тергеу жүргізудің маңыздылығына қоғам назарын аударуы тиіс.