Бишімбаевтың інісі Байжанов шағым түсірді: кассациялық сот не шешті?

2026 жылы 14 мамырда кассациялық сот Қуандық Бишімбаевпен бірге сотталған оның ағасы Бақытжан Байжановқа қатысты үкімге берілген шағымды қарады, деп хабарлайды Politico.kz.

Тараптардың уәждерін қарау қорытындысы бойынша сот үкімді өзгеріссіз қалдырып, кассациялық шағымды қанағаттандырудан бас тартты.

«Қылмыстық істер жөніндегі кассациялық сот Астананың мамандандырылған ауданаралық қылмыстық сотының 2024 жылы 13 мамырдағы үкімін және 2024 жылы 26 маусымдағы қылмыстық істер жөніндегі сот алқасының қаулысын Бақытжан Байжановқа қатысты өзгеріссіз қалдыру туралы қаулы етті», — деді судья.

3 сәуірде Салтанат Нүкенованы өлтіру ісі бойынша сотталған Қуандық Бишімбаевтың ағасы Бақытжан Байжановтың Кассациялық сотқа жүгінгені белгілі болған еді. Оның қорғаушылары үкімді қайта қарауға қол жеткізуді көздеген.

Байжановтың адвокаттары кассациялық шағым түсіріп, айыптау үкімінің күшін жоюды және қылмыс құрамы болмауына байланысты оны толық ақтауды талап етуде. Қорғау тарапының пікірінше, сотталған адамның әрекеттерінде аса ауыр қылмысты жасыру белгілері болмаған.

Сондай-ақ қорғау тарапы соттан тағайындалған жазаны жеңілдетуді сұрады. 

Еске салсақ, 2024 жылдың мамырында Астана соты Қуандық Бишімбаевты Салтанат Нүкенованы аса қатыгездікпен өлтіргені үшін кінәлі деп танып, 24 жылға бас бостандығынан айырған болатын. Ал Бақытжан Байжанов қылмысты жасыру бабы бойынша төрт жылға сотталды. Кейін апелляциялық саты үкімді өзгеріссіз қалдырды.

2025 жылы Байжанов Қазақстан Конституциясының 30 жылдығына орай жарияланған рақымшылыққа ілікті. Сот қаулысына сәйкес, оның жаза мерзімі үштен біріне қысқартылды. Ол 2026 жылдың желтоқсанында бостандыққа шығуы тиіс.