Боранда жоғалып кеткен: Солтүстікте ер адамның мәйіті далада табылды

Павлодар облысында қатты боран салдарынан малшы көз жұмды. Қайғылы жағдай Баянауыл ауданында болған, деп хабарлайды Politico.kz.

Төтенше жағдайлар департаментінің мәліметінше, 1980 жылы туған ер адам 10 наурыз күні сағат 14:00 шамасында жоғалған малды іздеуге атпен шығып кеткен. Алайда ол сол күйі үйіне оралмаған.Іздестіру жұмыстарынан кейін 11 наурыз күні таңертең оның денесі жұмыс орнынан шамамен 10 шақырым жердегі далада табылды. Құтқарушылар ер адамның өмір белгілерінсіз жатқанын анықтаған.

Сол күні Павлодар облысында ауа райы күрт бұзылып, күшті боран басталған. Желдің жылдамдығы секундына 23–28 метрге дейін жетіп, кей жерлерде 30 метрден асқан. Осыған байланысты өңірде дауылды ескерту жарияланды.

Төтенше қызметтер күшейтілген жұмыс режиміне көшті, ал тұрғындар үшін әкімдіктерде арнайы «жедел желілер» ашылды.

Соңғы бір тәулікте облыста жол-көлік оқиғаларынан 19 адам зардап шеккен. Құтқарушылар 49 рет шақыртуға шығып, 107 адамға, оның ішінде алты балаға көмек көрсеткен. Іздеу-құтқару жұмыстары көріну деңгейі өте төмен болған күрделі жағдайда жүргізілді.