Cтипендия екі есе өсті: жаңа оқу жылында студенттер қанша алады?

Қазақстанда 2025 жылғы жаңа оқу жылынан бастап студенттердің стипендиясы айтарлықтай өсіп, бұл өзгеріс жастар арасында үлкен қызығушылық тудырып отыр.

Жаңа мөлшерге сәйкес, бакалавриат студенттері ай сайын 52 372 теңге көлемінде шәкіртақы алатын болады. Бұл 2020 жылмен салыстырғанда екі есеге артық. Ал магистратура деңгейіндегі студенттерге 117 098 теңге, докторанттарға 262 500 теңге көлемінде стипендия төленеді. Бұл өз кезегінде аталған деңгейлер бойынша шәкіртақының 1,75 есеге өскенін көрсетеді.

Ерекше атап өтерлік жайт — педагогикалық бағытта білім алып жатқан болашақ мұғалімдер үшін шәкіртақы мөлшері 84 мың теңгеге жетіп отыр. Мемлекет басшысының айтуынша, бұл көрсеткіш соңғы бес жылда екі есеге артқан. Президент атап өткендей, мұндай нақты қолдаудың арқасында жастар арасында мұғалім мамандығына деген қызығушылық артып келеді.

2024 жылғы мәліметтермен салыстыра қарағанда, өткен жылы бакалавриаттағы студенттер 47 135 теңге, педагогикалық және медициналық бағыттағы студенттер 75 600 теңге, ал магистратурада оқитындар 107 061 теңге, докторантурадағылар 240 000 теңге көлемінде стипендия алған еді. Колледж студенттері арасында жұмысшы мамандықтар бойынша шәкіртақы мөлшері 43 574 теңге болса, орта буын мамандар үшін 41 896 теңгені құраған. Медициналық білім берудің интернатура және резидентура кезеңдерінде шәкіртақы тиісінше 85 376 және 123 122 теңге көлемінде болған.

Жалпы алғанда, шәкіртақы көлемінің өсуі білім алушылардың әлеуметтік қолдау деңгейін арттырып қана қоймай, елдегі білім сапасын көтеруге және жастардың болашақ мамандықтарды таңдаудағы ынтасын арттыруға оң ықпал етеді.