Дональд Трамп Зеленскийдің бейбітшілікке дайын екенін мәлімдеді

Дональд Трамп Украина президенті Владимир Зеленскийдің бейбітшілікке дайын екенін мәлімдеді, деп хабарлайды POLITICO.KZ.

Трамп The New York Post басылымына берген сұхбатында Зеленскиймен Украинадағы қантөгісті тоқтату жолдарын талқылағанын айтты.

«Ол бейбітшілікке дайын. Бұл жаңа нәрсе. Ол соғысты тоқтатып, бейбітшілік орнатқысы келеді», — деді Трамп. Оның айтуынша, екі жақ та бейбітшілік уақыты келгенін түсінген.

Трамп әлемдік көшбасшылармен, соның ішінде Франция президенті Эммануэль Макронмен НАТО-ның қаржылық мәселелері туралы сөйлесті. «Олар әділ үлес төлеуі керек», — деді ол. Сонымен қатар, Трамп Нотр-Дам соборында АҚШ-тың бірінші ханымы Джилл Байденмен жағымды әңгіме құрғанын жеткізді.

Трамп сондай-ақ британдық принц Уильяммен корольдік отбасының денсаулығы туралы сөйлесіп, Италия премьер-министрі Джорджа Мелонимен ынтымақтастық мәселелерін талқылағанын айтты.