Енді блогерлерге кеңес беру үшін диплом қажет

Қытайда әлеуметтік желіде контент жасайтын блогерлер мен инфлюенсерлерге қатысты жаңа заң қабылданды. Енді олар медицина, заң, білім немесе қаржы сияқты маңызды салалар бойынша ақпарат таратып, кеңес бергісі келсе, ресми түрде біліктілігін растауы тиіс, деп хабарлайды POLITICO.KZ Morocco World News-ке сілтеме жасап.

Жаңа ережеге сәйкес, қытайлық блогерлер бұл салаларда контент жасау үшін өздерінің құзыреттілігін дәлелдейтін диплом, кәсіби лицензия немесе сертификат ұсынуға міндетті. Бұл талаптың орындалуын әлеуметтік желі платформаларының өздері қадағалайтын болады.

Сонымен қатар, блогерлер өздері ұсынған кеңестер мен ақпараттың қандай зерттеулерге немесе дереккөздерге сүйеніп жасалғанын міндетті түрде көрсетуі керек.

Бұл жаңашылдық қоғамда бірқатар сұрақтар мен алаңдаушылық тудырып отыр. Көптеген адам бұл талаптардың тым тар шеңберде белгіленуі мүмкін екенін айтуда. Олардың пікірінше, бұл жағдай билікке ресми ақпаратқа күмән келтіретін немесе баламалы көзқарастарды білдіретін тұлғалардың үндеуін өшіруге қосымша мүмкіндік беруі мүмкін. Яғни, жаңа заң сөз бостандығын шектеудің тағы бір құралына айналуы ықтимал деген қауіп бар.